بنت بتحلم تنضم لفريق كرة وتشارك معاهم ف البطولات لكنها بتكتشف انها لازم تواجه واحد قوي جداً عشان ترجع حق جدها

بنت اسمها " رين " بتكون مسافرة من البلدة اللى هى ساكنة فيها ولسه جاية لبلدة جديدة ,, و بتكون لسه خارجة من محطة القطر ,, و بنعرف ان رين بتحب الفنون القتالية وخصوصا لعبة الكونج فو ,, و ده لانها اتعلمتها من جدها وبقت متقنة لكل فنون اللعبة دى ,, و لما بتخرج وبتلاقى اطفال بيلعبوا فى الشارع بتروح تتكلم معاهم وبتعرض عليهم يسيبوا اللعب اللى من غير هدف ده و يجوا عشان تعلمهم يلعبوا كونج فو ,, لكن الاطفال بيرفضوا و بيسيبوها و يمشوا بسرعة ,, وساعتها بتمشى هى كمان و بتروح على بيت جدها ,, و لما بتوصل هناك بتتفاجئ ان البيت كله متدمر وبيكون واضح ان فى حد اتهجم على جدها هنا وخلص عليه ,, و بتشوف الصورة بتاعته على الارض و بتكون زعلانة جداً عليها