انهاردة معانا مغامرة جديدة من مغامرات(تيين وولف) او (المستذئب المراهق). وهنعرف الخطر اللى كان بيواجه (سكوت) الألفا وباقي المستذئبين وإزاي واجهو الخطر ده بعد ما روح شريرة من العصور القديمة بتتحرر وبتقتل الناس.
بيبدأ الفيلم في مطعم في اليابان كان شغال فيه اتنين من المستذئبين اصحاب (سكوت)، كانو (ليام) و(هيكاري)، وبيتفاجئو بدخول واحد غامض ومغطي وشه وبيقرب منهم ويحط رصاصة من الفضة عليها رمز معين ويقولهم لغز امتي الباب مبيكونش باب، وساعتها (ليام) بييجي ويقوله انها مش فاهمة هو عاوز ايه، وساعتها الرجل الغامض ده بيقوله انها فاهمة و(هيكاري) بتجاوبه وتقوله لما بيكون موارب،
فالراجل الغريب ده بيقولها بقي انه عاوز البرطمان اللى عليه رمز الترايسكليون التلت دواير المتصلة، وانها معمولة من خشب شجرة مميزة والبرطمان ده محبوس فيه كيان مظلم بيقولو عليه(كيتسوني) والروح اللى جواه دي اسمها (نوغيتسوني).
وساعتها لما بيقولوله انهم مش عارفين هو بيتكلم عن ايه والاحسن يمشي، بس هو بيفاجئه وبيناديه بإسمه وفي لحظة كل الموجودين بيطلعو سلاحهم وبيستعدو للمعركة اللى هتحصل.
فـ(هيكاري) بتاخد البرطمان اللى عليه المشكلة وتهرب بسرعة من المطعم و(ليام) واصحابه بيهاجمو الراجل ده، بس هو بيتخلص منهم وفي ثواني بيخرج ورا (هيكاري) ويضربها برصاصة في رجلها يوقعها علي الارض،
وبيقرب منها عشان يقتلها بس في لحظة كان (ليام) جه وبيهجم علي الراجل اللي كان اسرع منه وبيضربه برصاصة في صدره ويوقع بعيد، وساعتها بيروح هو ياخد برطمان الكيتسوني عشان يفتحه، ولما بيقولوله انه مش عارف هو بيعمل ايه وانه مش هيعرف يسيطر عليه، بيقولهم انه بقاله سنين بيدور عليه وعارف هو بيعمل ايه بالظبط ومش عاوز يسيطر عليه هو عاوز يحرره وبس.
وبياخد البرطمان، وساعتها روح النوغيتسوني بتنادي عليه وتقوله يحررها بس هو بيرفض غير لما توعده انها تساعده في انتقامه، وفعلا بيفتح البرطمان ويخرج منه حشرة مضيئة بتطير في الجو.
وبعدها بننتقل بالمشهد لمدينة تانية في امريكا وكان ساعتها المطافي وفرق الانقاذ متجمعين وبينقذو الناس من تحت مبني اتهد علي اللي فيه، و(ألان) كان موجود مع الفريق، لان فيه واحد من المسعفين لما دخل ينقذ بنت صغيرة الكلب بتاعها عضه ومخلهوش يقرب منها، وبيقوله ان فيه واحد موهوب جاي في السكة هو اللي بيعرف يتعامل مع المواقف دي لانه الالفا.