بيبدأ الفيلم مع شخص اسمه " ميلر " و هو راكب العربية بتاعته و رايح مع صديقه المقرب " كيفين " عشان يقابلوا محقق شرطة فاسد اسمه " زويك " ,, و بنعرف ان زويك بيعمل اعمال غير شرعية لحسابه الشخصي و بيستخدم ميلر و كيفين عشان ينفذوا ليه المهمات دى ,, و بيكون المهمة اللى هما جايين عشانها النهاردة هى سرقة بنك عن طريق المخزن الخلفى بتاعه و بيديهم خريطة للمكان عشان يعرفوا يتحركوا جوة البنك بسهولة و يعرفوا مكان الخزنة ,, و بيعرفهم ان الشرطة مش هتعرف باللى بيعملوه وميخافوش منهم لان المكان كله لسه جديد وتحت الانشاء عشان كدة مفيش كاميرات وبالتالى مفيش خطر و محدش هيشوفهم ,, و فعلا بيدخل "ميلر " و كيفين " وبيقدر ميلر يفتح القفل و يدخلوا جوة و بيبدأوا يكسروا الحيطة اللى فيها الخزنة ,, و بمجرد ما بيفتحوها بيشوفوا الشنطة اللى فيها الفلوس ,, لكن المشكلة ان فى جهاز استشعار للحركة موجود للخزنة ,, و ده بيخلى الشرطة تعرف ان فى حركة مش طبيعية بتحصل ,, و ساعتها قسم الشركة بيتواصل مع المحقق " زويك " عشان يقوله ان فى عملية سرقة بتحصل فى المنطقة اللى هو فيها ,, وبيطلبوا منه يتحرك على هناك و يشوف ايه اللى بيحصل ,, و ساعتها بيتحرك " زويك " و بيضرب نار على العربية بتاعته و بيستنى قدام البنك و لما بيخرج " كيفين " بيتفاجئ ان زويك بيضربه بالنار و بيخلص عليه ,, و ساعتها بتوصل الشرطة و بيقولهم ان كيفين كان بيحاول يضربه و ضرب رصاصتين جم فى العربية بتاعته ,, و ميلر بيسمع اصوات ضرب نار برة و بيخرج عشان يشوف ايه اللى بيحصل ,, و ساعتها بيتفاجئ ان فى شرطة كتير و ان زويك معاهم و بيقبض عليه و بيهدده انه لو اتكلم او جاب سيرته هيخلص على مراته و بنته ,, و بيعرفه انه لازم يقول فى المحكمة ان كيفين كان معاه مسدس و كان بيحاول يضرب زويك عشان كدة قتله دفاع عن النفس ,, و ساعتها بيضطر " ميلر " انه يسمع كلامه وميقولش اى حاجة تخص زويك فى المحكمة